Մտորումներ ՀՀ անվտանգության շուրջ
Ընդամենը մի քանի ամիս առաջ ՀՀ նախորդ նախագահն այսօրվա կոալիցիոն կառավարության մասնակիցներից մեկի՝ ՕԵԿ-ի ղեկավարին «դավաճան» էր որակում՝ կապված բրիտանացի դիվանագետի հետ գաղտնալսված խոսակցությանն առնչվող հայտնի միջադեպի հետ: Արի ու տես, որ այդ «դավաճանը» մի քանի օրից կզբաղեցնի, ոչ ավել, ոչ պակաս, երկրի Անվտանգության խորհրդի քարտուղարի պաշտոնը: Ավելին՝ «դավաճանի» կողմից ղեկավարվող կուսակցությանը վստահվել են կարեւոր նախարարական պորտֆելներ: Հարց է ծագում. մի՞թե սա մտահոգիչ չէ: Պատասխանն ինքնին ենթադրվում է. սա մտահոգիչ կարող է լինել միայն նրանց համար, ովքեր կիսում են նախորդ նախագահի կողմից հնչեցված գնահատականը: Բայց չէ՞ որ, մյուս կողմից էլ, այս խնդիրը հասարակական պարզ քննարկման առարկա դարձնել չի կարելի: Վերջապես՝ մեջտեղում երկրի անվտանգության հարցն է: Անշուշտ, կարեւոր է, թե ինչ է մտածում այս մասին հանրությունը, սակայն, տվյալ դեպքում, առավել կարեւոր է թվում այն, թե այս ամենի մասին ինչ է մտածում նոր նախագահը, որն իրեն, ինչպես հայտնի է, համարում է իր նախորդի քաղաքականության կրողն ու շարունակողը:
Ասելիքս այն է, որ հարկ է այս հարցում վերջնական հստակություն մտցնել: Այսինքն՝ նոր նախագահը պետք է բնակչությանը հանգստացնի՝ ապացուցելով, որ երկրի անվտանգության ապագա պատասխանատուներից մեկը, այնուամենայնիվ, դավաճան չէ, եւ բրիտանացու հետ նրա ունեցած խոսակցության մեջ Հայաստանի անվտանգությանը սպառնող որեւէ տարր չի պարունակվում: Դա սովորական զրույց էր քաղաքական գործչի եւ դիվանագետի միջեւ, որը խորհրդարանական ընտրությունների քարոզչության (ավելի ճիշտ՝ հակաքարոզչության) շրջանակներում մատուցվել էր որպես «սկանդալ» եւ հայտնվել էր այլ քաղաքական գործիչների «տան փալասների» տակ: Սրանով, սակայն, ՀՀ նոր ղեկավարն իր անելիքն ավարտված չպետք է համարի: Նա պետք է նաեւ պարզաբանի, թե ամիսներ առաջ այդ ո՞վ էր թաքուն սպառնալիքներ հղում Հայաստանի անվտանգության խորհրդի քարտուղարի պաշտոնը զբաղեցնել պատրաստվող մարդուն, եւ արդյոք նույն վտանգները նրան չե՞ն սպառնում նաեւ այսօր: Բա մարդիկ չիմանա՞ն, թե որքանով է հուսալի պաշտպանված իրենց երկրի Անվտանգության խորհրդի քարտուղարը, հետեւաբար եւ՝ որքանով է այսօր ապահովված Հայաստանի անվտանգությունը:
ՀՀ բնակչությունն այսօր շատ մարտահրավերների առջեւ է կանգնած՝ թանկություն, զանազան սակագների թռիչք, դեմոկրատիայի ու վստահության պակաս եւ այլն: Գոնե մի՝ անվտանգության հարցում մարդիկ իրենց մի քիչ պաշտպանված չզգա՞ն:
ՏԻԳՐԱՆ ԱՎԵՏԻՍՅԱՆ